本文重點
認股證喺香港有差唔多廿年歷史，好多人都覺得始終叫「窩輪」順口好多，亦都知係來自「Warrant」嘅英文讀音。不過，比聯股票衍生產品部聯席董事阮嘉麗（Connie）話，「Warrant」嘅串法考起咗唔少散戶。
Connie尋日約埋成班老友介紹佢哋全新內容嘅窩輪及牛熊證網站，佢同絲絲講，最勁係五大獨家數據，畀投資者了解風險、輪價同步性及提高引伸波幅透明度。
就連網址都由用咗四、五年嘅「www.kbcwarrant.com」改做「kbcw.com.hk」。Connie話因為易記，絲絲覺得舊網址都好易記啫，佢就話向唔少人介紹舊網址都被反問「Warrant」點串，為咗方便大家，所以進一步簡化網名。
提建議獲二千蚊禮券
為咗更方便用家，新、舊兩個網站暫時會同時運作，直至投資者適應後先關閉舊網站。
比聯認真落重本，唔單止用咗十個月時間開發，仲搞埋「網上意見大搜查」，只要將對新網站嘅建議電郵去kbcwarrants@kbcfp.com，有關意見一旦獲取錄，就可得到二千元超市禮券，名額一百份。嘩！總值成二十萬元㗎。
余絲韻