本文重點
全球貿易量大減，唔少航運公司都「縮皮」，內地航運龍頭航企中遠控股（01919）董事長魏家福都話目前係航運業冬天，仲大談可度過今次嚴冬嘅方法。
「三冬」度行業嚴冬
魏家福話要度過嚴冬，企業會選擇三種方法，包括冬眠、冬泳同埋冬訓。細企業要「冬眠」，少做少錯，靜靜等待春天嘅來臨；「冬泳」就係喺市場低迷時撈底，進行購併，但係一唔小心可能會凍親；大企業好似中遠咁就要進行「冬訓」，要積極面對困境，增強實力。
究竟「冬訓」係乜嘢？就係減少開支，增加現金。喺○七年嘅時候，佢已經率領一班精英，研究美國金融危機，仲喺去年初取消乾散貨船訂購合約。佢仲有其他「法寶」，包括將海外銀行存款調番內地銀行，同時堅持「現金為王」原則，直到依家公司已經有超過700億人仔嘅現金，仲與內地銀行達成750億人仔信貸額度，足以應付未來兩年嘅艱難時勢。
余絲韻