本文重點
小股東去股東周年大會，除咗見吓管理層、問吓問題外，最大目的之一梗係享用吓大會嘅茶點，食餐飽啦，但港交所（00388）尋日嘅股東周年大會，竟然一改往年「有嘢飲、有嘢食」嘅慣例，只得飲品供應，佢哋仲特別喺寄畀股東嘅通函中，已一早列明「敬請注意，大會聊備飲品招待」。
僅供應飲品 股東一掃光
絲絲年年都有去港交所股東大會捧場，記得往年都有三文治招待，但今年就冇咗。港交所解釋話，港交所嘅登記股東由以往約二千多名增加至五千多名，由於要預留足夠座位畀股東，除咗喺交易大堂展覽廳內，展覽廳外亦增設咗近百個座位，由於地方唔夠，未有食品招待。
尋日約有二百幾名股東出席，唔知係咪港交所嘅股東眼見無食品供應，散場時突然好似「一陣風」咁，六百幾包紙包飲品短時間內被掃清！佢哋亦物盡其用，雖然收咗市，一見有股票機，都不忘㩒機睇吓愛股價格，幾時都話香港人腦筋轉數快啦！
唔講唔知，雖然登記股東人數多咗，但今年出席可能冇上年咁熱鬧，原來舊年港交所股東大會撞正恒生股東大會，橫掂都喺中環搞股東會，啲股東去完恒生再落埋交易所，非常順路，所以去年股東會鬼咁墟冚。
余絲韻