前日隻鎊真係跌穿1.45，結果我喺1.4482止蝕，揩咗150點度。之後隻鎊繼續跌，低見1.4400先至回升。其實，歐洲市早段，英國公布嘅三月份失業率冇預期咁差，申領失業救濟人數嘅增幅亦冇預期咁大，隻鎊都企番穩，之後彈過上1.46，帳面仲有錢賺添，可惜冇趁機食胡，結果後來因為英國財政大臣發表預算案，預計財赤大增，隻鎊掉頭急插，所以先至決定止蝕。
不過，諗落都幾蠢，因為當時我同朋友食緊飯，都唔知個預算案公布咗未，而且又見佢破頂，梗係唔走住啦，但勢估唔到隻鎊後嚟跌得咁急，冇計。不過，前晚我見美元兌YEN企喺97嘅七、八十，啱啱守住條上升軌同50日線，所以就喺97.88沽咗一手YEN，望佢跌番去100啦。
尋日Jenny打畀我，問我有冇入市，我話cut咗手鎊，佢唔知係咪打嚟晒命，話前晚見隻鎊跌穿1.44之後彈番轉頭，所以後來喺1.4444揸咗一手，尋日晏晝見隻鎊升到1.45八、九十，於是平咗倉。所以幾時都話，炒嘢點都要有啲運。
蘇小妹