本文重點
上實控股（00363）去年收購咗上海四季酒店，點知撞正金融海嘯，董事長滕一龍好坦白承認生意有啲難做，不過絲絲就認為股東唔使咁驚，因為滕董尋日好Hard sell，上實有個咁努力幫公司推銷嘅高層，點都有啲保障嘅。
滬四季酒店平價促銷
絲絲早排收到港龍航空嘅促銷電郵，話去上海住四季酒店兩晚連機票來回，仲要包埋酒店晚餐都只係2,788大元。滕一龍話絲絲冇眼花，個價真係咁低，主要係由於奧運期間為保安全，所以限制咗人數入境，之後又發生金融危機，搞到上海所有高端酒店生意死晒火，四季酒店都唔例外，不過佢哋呢排自己內部都搞緊好多促銷。
滕董猛咁讚四季酒店地點好方便，真係可以話又靚又好住，仲邀請絲絲去住吓。呢位董事長認真落力，無時無刻都幫自己酒店促銷賣廣告，睇嚟上實嘅小股東有福啦，有個睇業務咁緊嘅董事長揸弗，唔會差得去邊。
余絲韻