本文重點
金融海嘯下，財經大事一浪接一浪，幾乎完全冇停過。心水清嘅朋友唔知有無發覺，本港多位財金高官或要員約滿前都有「大單嘢」發生，好似金管局總裁任志剛就有雷曼迷債事件，港交所（00388）行政總裁周文耀就有收市競價時段，連前港交所上市科主管韋思齊臨返英國前，都整單延長董事禁止買賣期爭議要搞足幾個月，大家覺得係咪好蹺？
避唔過係天意難違？
上面幾個只係近期例子，再數遠啲，仲有前證監會主席梁定邦離任前發生正達事件，同樣係前證監會主席嘅沈聯濤走之前幾年就有仙股事件，都咪話唔巧合！
大家如果再細心啲，更發覺部分人如果唔續約，其實係可避過「大單嘢」嘅，有中環友就話，唔通真係「天意」難違，任期一夠就要走，唔好戀棧？絲絲就唔係幾同意中環友嘅睇法，經濟係有周期嘅，遇啱低潮自然多嘢發生，有「大單嘢」有乜出奇？下下都市面好，無風無浪，太平盛世，就唔使畀咁高人工呢班財金官員啦，佢哋坐得咁高位，亦預咗要接受超高難度嘅挑戰呢！再講，都要嗰個人有能力至會被要求再坐多一會、續約，絲絲心諗，如果任期一夠就要走咪好瘀！
余絲韻