美國啲銀行點執靚份業績都無用，最後亦唔能夠遮掩其資產質素繼續變壞呢個弱點，隔晚美股三大指數齊跌。港股昨受拖累，不過古晨相信下周結算前，好友都會力頂，仲有貨未食胡，呢兩日仲有機會。
新奧燃氣（02688）早前公布去年業績，純利上升24.2%至6.31億元人民幣，期內燃氣接駁業務盈利上升29%。業績公布後，大摩同花旗都出報告唱好，分別建議「增持」同「買入」。新奧去年業績符合市場預期，預料未來盈利增長主要來自經常性氣量銷售額增加，而○八年度起的正現金流更有持續趨勢。預期○九年度售氣量持續增加，估計住宅及工商用接駁服務不會大幅下降，每股基本盈利可望增長逾兩成。
此外，未決定的售氣量需求合約將加快簽訂，以及預期集團天然氣價格更具競爭力，新奧自然要睇高一線。現價買入，目標價12.2元，跌穿9.2元止蝕。
古晨