本以為港股在長假期前會比較淡靜，殊不知好淡友你一拳我一腳，市況激烈，最後恒指埋單計數仲有有356點進帳，收報14,901點，升幅2.45%。藍籌及重磅股高位拉鋸，資金開始流向三、四線股身上。上星期四個交易日中，就有兩隻股票累積超過一倍升幅，贏家係華藝礦業（00559），由0.3元飆升至0.7元，一周升幅達1.33倍，拋離第二位升1.17倍的海王集團（00070）。
上周二，華藝表示悉售合營福建金藝銅業的9%股權畀紫金礦業（02899），作價1,710萬元人民幣（折合1,943萬港元），交易預期帶來265萬元收益。華藝表示，套現用作一般營運之用，不過睇見早輪華藝的○八年成績表，勁蝕3.06億，今次出售資產，難免令人覺得有削肉還母的味道，就算上星期股價勁升，最多都只能算係慘勝。