本文重點
有唔少上市公司嘅主席鍾情參與慈善活動，其中一位表表者係身兼保良局主席嘅飛達（01100）副主席兼董事總經理顏寶鈴。絲絲聽顏主席講，前日係佢任保良局主席嘅「Last day」，保良局為此搞咗個歡送會，一班人玩得太夜太放，所以尋日喺業績會上，顏主席就唔係太精神。
顏主席又話，今年公司蝕錢，佢自己都唔開心，惟有派末期股息3仙安慰吓股東，相信今年公司唔會再蝕錢。
離任保良局專注飛達
講開佢嘅保良局「Farewell Party」，大家都玩得好開心，佢仲話原來喺金融海嘯下，保良局舊年有成一億多元善款，喺佢在任期間，有呢個成績都算唔錯，家陣可以退下火線，專心去打理公司業務。
絲絲聽朋友講，顏寶鈴曾經話過，因為之前忙於保良局慈善活動，感覺對唔住公司嘅員工，所以答應唔做保良局主席後，立即返公司支持吓員工。
余絲韻