本文重點
新盤市場百花齊放，發展商促銷樓盤嘅招式可謂層出不窮，長實（00001）劉啟文昨日同Vincent講，配合天水圍栢慧豪廷明日起開放示範單位，集團特別夥拍紅磡都會商場商戶等，為該盤推出有獎有賞睇樓優惠，各睇樓客在進入示範單位前，可從途經嘅獎賞機「㩒飛」，每人都可獲得指定優惠。
至於獎賞詳情就會在獎賞機發出嘅「飛仔」上列明，過程簡單之餘，睇樓客亦可感受即場抽獎嘅刺激。劉啟文仲話，今次睇樓客可獲得嘅獎賞多達60項，總值逾100萬元，包括都會海逸酒店自助餐優惠等，特別大獎係紅磡海韻軒及海韻灣1晚酒店住宿。
美聯新界分行成績驕人
近期樓市現小陽春，令代理行嘅業績好睇咗好多，美聯（01200）布少明報喜話，市場氣氛好轉，帶動旗下新界區分行在今年頭三個月錄得3間300萬分行，而在首季，新界區亦分別有24間百萬分行及兩間200萬分行，成績算係相當理想，而今次新界區最受惠，而根據美聯研究部嘅數據睇到，此類細價樓嘅二手註冊量佔全港二手註冊超過六成，市場交投轉旺，代理生意自然無咁難做。
（Vincent Lau）