一如所料，受惠國務院公布新醫療改革方案意見，尋日醫療股就大炒特炒，就連本港醫療股都借勢炒上，部分如中國仁濟醫療（00648）、維奧醫藥（01164）等都打進二十大升幅榜之中，但講到尾，今次中央公布的只係意見，借勢炒作雖然難免，但持久力則宜另作別論。反而尋日見新能源股又再有異動，唔排除今日又會引來資金轉炒。
講開又講，尋日係內地假後復市，上證指數走勢算係唔錯，尾市更加彈番上去，最終都能夠以微升19點，企穩在2,439點收市。況且，本周內地首季經濟數據將會陸續公布，當中包括進出口數據、信貸數據，以及將於下周公布的消費物價指數等，相信相關概念股又將會有一番炒作，不妨留意一下。
至於大市，尋日午市過後，恒指跌幅明顯收窄，股價跌幅亦都細咗，尾市抽番上嚟，令人憧憬大市似乎未挾夠，今日將再接再厲！
（小尾）