好唔容易又過咗一個季度，從成交可見，卜架生意依然淡薄。有卜架話，近期大市係咁挾淡倉，唔少「熊仔」擁躉被殺到一頸血，但如果反手做好，恒指已高企喺萬五點邊，落場追貨嘅決定唔易做，故戰意仍濃嘅散戶實在唔多。
亦有資深卜架話，見到內地為咗救市，針對各行業推出振興方案，又放多啲同胞來港消費，原意都係好，但講到底，金魚缸有「水」才活，內部發力過後，能否成功吸引到外來資金重投大中華區市場，先至係市況復甦嘅關鍵。
雖然市況偏靜，但部分中型卜架行仍樂於保持一定嘅知名度，以留住客戶，其中一個方法係邀請城中財經演員坐鎮做「生招牌」。筆者就聽聞，嚟緊某專長術數論市嘅財經分析員，會過檔一家B組經紀行，究竟係邊個就等各位估吓，真真假假，好快會有答案！
余絲韻