本文重點
恒生銀行（00011）「柯大俠」（副董事長兼行政總裁柯清輝）宣布退休，就快無官一身輕嘅佢，喺恒生嘅內部刊物最後一次撰文，寄語員工要逆境自強，仲作出盡量調整人手，避免一刀切裁員嘅最後承諾添！
承諾避免一刀切裁員
「柯大俠」最後一次喺恒生內部刊物《恒園》，繼續我手寫我心，臨別依依，佢嘅一字一句都感慨萬千。唔少賓卡都話銀行係講求「人」嘅行業，即係員工就係銀行嘅財富，睇嚟柯大俠都有如此睇法，皆因佢一開頭，就係多謝一班貢獻良多嘅同事，仲話深深體會大家工作嘅熱忱，為此感到自豪。
字裏行間亦不忘提醒員工要自我增值，勉勵員工逆境自強嘅柯生，臨尾一次都拍心口話恒生一定會繼續致力控制成本，透過員工自然流失同埋內部調職，以及為同事安排培訓提升技能，避免以一刀切嘅方式調整人手。咁以員工利益為大前提嘅老細下個月就同大家講再見，叫一眾員工點捨得呢？
呢個金融海嘯，雖然連喺銀行界浸淫咗37年嘅柯生都話前所未見，但恒生勝在無次按，債券組合又早做部署調整，睇嚟接手嘅梁太（現任滙豐集團總經理兼工商業務環球聯席主管梁高美懿）同埋一班員工，最重要嘅係保持恒生「永恒生長」就得啦！
余絲韻