前日喺1.4922揸咗一手鎊，結果夜晚見佢跌穿1.48，最後決定止蝕，揩咗百幾點。不過聽老編講，有個炒家舊年十月喺101沽咗YEN，半年捱咗千六點，前日先至「放監」。可以坐咁耐艇都未斬，主要係因為做得細。我試過一張鎊輸400點，各位千祈唔好學，唔係所有貨幣都可以坐得返嚟㗎，只係隻YEN比較特別咋！
隻鎊止蝕後，諗諗吓不如沽番轉頭，因為早排都係喺1.46沽，依家仲有1.47，而且距離高位只係差百五點度，隻鎊仲有大把水位跌，所以最後喺1.4786沽咗一手。夜晚十一點隻鎊急跌，一路隊到落去1.47三十幾，睇news就話，有間英國私人機構話英國赤字會升到佔GDP超過10%，跟住報價機又話聯儲局同歐洲、英國、日本同瑞士央行達成貨幣互換協議，但我認為呢啲都唔係隻鎊跌嘅主要原因，我認為只係英鎊短期升得太急而出現調整。尋日朝見唔到1.4635嗰口價，下晝見隻鎊上番1.47先止賺，跟手喺1.4712揸番一手。
蘇小妹