國企指數亦溫和下跌31點，報收8,772點；現貨場成交額縮水至510億元，暫未見有資金流出。期貨場大低水166點，報收14,762點。口痕友話反彈可能完結，但古勝認為有蠱惑，唔排除大戶刻意營造低水，引誘散戶繼續做淡。
紅色錢莊繼續跑贏
大笨象（00005）供股股份明日出籠，暫未見沽壓嚴重，昨日跌1.63%，報收51.2元，都係急升後正常回吐。祖國移動（00941）跌1%，報收69.5元。其他大隻佬表現好壞參半，紅色錢莊表現勝一籌，本地地主卻見腳軟。有缸湖傳聞指，北大人短期內再推新刺激經濟方案，紅色錢莊下半場逆市上揚。自「高佬盛」答應將工行（01398）禁售期延至明年後，工行有發力追落後之勢，昨日再升1.6%，報收4.26元。其他紅色錢莊普遍亦升逾1%，表現不俗。
波羅的海指數創兩個多月新低，貓貓狗狗（01199）跟招商局（00144）分別跌5.2%及4.6%，之前航運股熱炒，在下認為不過係熊市中的反彈，航運業周期甚長，唔係咁容易可以從谷底中走出來重見光明。
「油魔」腳軟，油價急挫至50美元邊緣，中海油（00883）跌3%，中石油（00857）亦跌2%，中石化（00386）跌幅較溫和，報收5.62元，跌幅不足1%。九倉（00004）宣布出售一半電車公司股權，但孖屐對呢個消息似乎唔多滿意，股價跌4.7%，報收20.9元。
電盈（00008）私有化獲高院批准，雖然證監提出上訴，但古勝聽司法界老友講，證監上訴贏面唔高，電盈私有化料可通過，現價值唔值博，古勝烏卜卜，總之仲有唔明朗因素，都係避之則吉。
中國電力新能源（00735）昨日股價逆市上升，八卦公叫留意，皆因近期股仔炒得勁，中電能差不多係時候落鑊。截至去年十月底止，中電能每股NAV約0.65元，現價0.335元，折讓接近一半，P/B只有0.51倍，相對祖國魚缸同類股份，P/B均在1倍之上，中電能較為吸引。
股東背景實力雄厚
自去年中電能換上新舵手後，積極拓展風電、水電及垃圾焚化發電等新能源業務，業務轉型漸見成果。截至去年十月底止，○八年半年度營業額收入7.16億元，另連電費調整收益計，總收入10.61億元，大增1.5倍，並成功扭虧為盈賺2,203萬元，總算有個好開始。
在過去三個月，公司獲「中國電力新能源有限公司」行使可換股票據後，成集團大股東，現持中電能20.03億股或28.4%。後者中國電力新能源的終極控股為國資委，股東背景雄厚，加上業務受惠於環保國策，其前景值得睇高一線。○八年半年盈利扭虧為盈，下半年再無金融資產減值，○九年則踏入全面收成期，以股價上番每股NAV0.65元，即接近翻一番。
古勝