本文重點
金融海嘯爆發後，唔少代理行靜靜縮減規模休養生息，不過，行內亦有少數外資大行逆市錄得理想業績之餘，都諗住趁機增聘人手。Ｖincent聽聞，第一太平戴維斯嘅住宅銷售部，舊年年頭至今，加加埋埋嘅成交額超過66億元，該公司資深董事兼投資及銷售主管（港澳區）袁志光（Peter）笑笑口話，該行喺山頂逾億元的成交市場佔有率更高達100%。
祥益廣州執業試過關
Peter仲話，近期豪宅走勢唔錯，好似該行本年至今促成嘅逾億元大刁，總值約15億元，近月唔單只旺丁，仲旺財，如上季超級豪宅樓價按季錄10%至20%升幅，好明顯係本港樓市呈復甦嘅迹象，所以該行將會集中人手攻洋房市場，仲積極招攬人才加盟。
地產代理監管局與廣州市有關部門達成協議，令本港代理可以通過於香港舉辦嘅培訓同考試，攞到在該市執業嘅資格證書，據聞代理報考反應唔錯，其中祥益老闆汪敦敬更同Vincent講，佢早前連同老闆娘汪陳葉菁、公司董事、主管、少帥及營業員一齊參與有關考試，並且已經在日前攞到成績單，而今次佢哋嘅考試合格率高達百分之百，成績相當理想。而老闆娘汪陳葉菁仲話，今次所有考試嘅同事能順利過關，除咗可擴闊生意網外，更可加深對廣州執業嘅了解。
（Vincent Lau）