尋日內地有一項研究顯示，指北京、廣州、深圳、上海及成都等十個城市，首季新樓成交量都較去年同期出現上漲，當中深圳首季的商品房成交量，更同比上升239.42%，再加上近日市場重提內地減息的可能，難怪近日內房股股價都見節節上升，部分股份如北辰（00588）以及富力地產（02777），尋日亦分別上升18.24%以及17.76%，不過股友們要留意，內房股經已連升多個交易日，具有一定累積升幅，再追有一定風險。
至於尋日大市，小尾就真係要用「估佢唔到」來形容！雖然日前美股升逾百點，都預咗恒指會做好，但一升就升成千點，仲要破晒位添。當中權重股如滙控（00005）、中移（00941）、港交所（00388）以及本地地產股等都見炒作。
之但係尋日升得咁勁，淡友當然損失慘重啦，數一數，尋日就有六十隻熊證被回收，距離回收價尚有1%以下的熊證亦達九隻之多呢！
（小尾）