本文重點
經濟環境係點相信唔使絲絲講，大家都有眼睇，就嚟投身社會嘅一班大學生，分分鐘月賺四千更加係無眼睇。不過喺花旗銀行大學課程畢業嘅學生就唔使閉翳，皆因佢哋喺花旗做實習嘅薪酬係當正職計，睇嚟花旗被尊稱「銀行界少林寺」確實唔係浪得虛名！
畢業大學生投身銀行界，閒閒哋都講緊月入過萬，呢班仲未畢業就可以喺花旗銀行實習嘅中文大學學生認真巴閉，身價跑贏晒只值四千蚊嘅應屆畢業生，羨慕死人。不過要喺花旗實習都唔係咁易，尋日出席花旗香港及中大合辦嘅銀行課程畢業禮嘅50名學生，個個報讀課程時都要過五關斬六將先爭得一席。今年4名成績優異嘅學生雖然唔似往年可以去交流團，但就會被安排喺亞洲區嘅一間花旗分行做實習，其餘個別學生則有機會喺香港嘅分行實習，見識吓花旗香港環球個人銀行服務行政總裁及總經理盧韋柏點樣將該行帶領得有聲有色。
金管請人查雷曼
除咗花旗，金管局都有份促進就業，尋日絲絲喺國金二期「血拼」時，見到有條好似喺名店外面等買嘢嘅人龍，一問之下得知佢哋去金管局見工，做乜？原來係幫手查雷曼單嘢！見佢哋個個樣子青澀，話唔定都係應屆畢業生，唔知呢班大學生喺金管局度又值幾錢？