港股昨日表現出色，成交額更超過700億元，反映有熱錢流入，睇嚟後市仲可睇高一線，有條件挑戰15,500點。不過，大市由11,500點反彈咗成三千點，高追又好似蝕章，都係搵落後股穩陣。上海電氣（02727）相對同業落後，值得留意。
昨日上海電氣升3%，表現唔算突出，但成交大增，相信好快有突破。該股現價只有1倍市帳率，較同業東方電氣（01072）4倍低得多。以基本因素而論，上氣在火、風及核各方面的電力設備所獲的定單也有不俗的數目，尤其核電方面，去年已接獲了內地歷來最大核電常規島設備定單，市佔率大幅提升。
集團截至去年六月底淨現金高達90.37億元人民幣，計入○八年下半年保留盈利及增發A股集資後，財力更雄厚。鄧普頓基金近日頻頻增持，持股量已逾8%，料有後着。該股一月二日高位3.26元，追番大市升幅，都仲有0.9元上升空間。
古晨