前日喺1.4326揸咗一手鎊，雖然喺紐約市幾次衝上1.44都遇到好大阻力，但都只係跌番去1.43八十幾，夜晚美國私人機構ADP公布個非農業就業職位減少74.2萬，係有紀錄以嚟最多嘅一次，反映美國就業市場繼續惡化，今日美國勞工部公布嘅就業數據都唔慌會好得去邊。我見個就業數據差，市場都冇乜反應，於是繼續hold住隻鎊。點知後來美國供應管理協會公布嘅三月份製造業指數升番些少，我見隻鎊幾次衝1.44都企唔到上去，之後回調，而我嘅帳面利潤就所餘無幾。
好彩後來隻鎊都升番轉頭，之後一路上番1.44，凌晨三點未夠，隻鎊抽到上去1.44四十幾，咁夜先至衝day high，第二日應該仲會繼續升，所以決定揸住先。尋日朝八點幾起身，已經見隻鎊上到1.44六十幾七十，接近中午仲升穿1.45，但之後落番去，但反彈幅度接近三月二十四號到星期一嘅61.8%，而且1.45又係心理位，破到都未必企得穩，我驚唔食又冇埋，於是喺1.4481止賺。
蘇小妹