本文重點
早前樓市大吹淡風，大部分代理都呻無啖好食，不過情況喺近排就出現逆轉，Vincent昨日見到兩間代理行嘅老友都笑笑口，原來係受近期多個新盤排住隊登場「帶挈」，加上個個盤都賣得唔錯，令利嘉閣及中原兩公司上月嘅佣金均勁升約五成，由於今次新盤推售潮未完，佢地仲預期今個月嘅表現更理想。
利嘉閣五員工攞獎
利嘉閣廖偉強表示，公司三月份佣金收入達六千一百萬元，按月升五成，有三成半來自新盤；中原陳永傑亦話，市民置業信心轉強，近期市場成交明顯多咗，該行上月佣金收入二億元，其中住宅部佔一點八五億元，比二月份的一點二五億元多咗四成八，相信今個月多個大盤開賣，佣金將可進一步增多。
不論係任職大行、定係細行嘅代理，只要跑到數就係好員工，所以有關銷售嘅獎項，對代理就有相當大意義。
利嘉閣老友話，公司近年都有派員參與香港管理專業協會舉辦嘅「傑出推銷員獎」，今年精選嘅五名參賽員工亦悉數得獎，成功率達到百分百；而五名得獎員工有三名獲得傑出推銷員獎，分別係大埔廣場分行嘅侯明賢、九龍塘森麻實分行嘅莫海榮及銅鑼灣禮頓道分行嘅譚立明，至於東涌分行嘅鄭健糧及將軍澳都會分行嘅岑瑋雋，就攞到傑出青年推銷員獎。
（Vincent Lau）