撐姜濤夠癲啱做ERROR Edan：我哋唔只型！
人氣男團MIRROR成員Edan（呂爵安）昨日偕陳欣妍出席配音動畫慈善首映禮，獲近千「爵屎」到場支持，逼爆6層商場，尖叫聲震爆全場。講到配音首日喉嚨痛失聲，Edan透露當時剛拍完《調教你MIRROR》：「玩到好癲，把聲爛咗，所以第一日配音要請假。（配音老師為你平反冇懶音？）其實知道自己有啲咩問題嘅，音調方面都會多加留意，我大學有個室友係讀言語治療，所以幫我慢慢tune番。」
儲錢畀首期
講到昨日是ERROR的阿Dee生日，被肥仔踢爆一直想做隊長，經理人花姐就反建議調人氣王姜濤過去做ERROR隊長，實行兩大組合大兜亂，對此Edan笑言：「其實好多人都話我好啱ERROR，其實我哋好多成員都啱，唔好睇姜濤好偶像派，其實佢玩起上嚟好癲，我哋唔係淨得型嘅一面，都有貼地一面，所以我都支持姜濤過去，哈哈，講笑啫！」
有指MIRROR吸金逾億，可望將公司業績轉虧為盈，他說：「咁犀利？我唔知公司賺幾錢同係咪轉虧為盈，但都希望係真，咁先可以加人工。（有冇計過進帳幾多？ ）多過之前好多嘅，初出道未有咁多工作機會，但都唔知幾多。（依家儲到首期買樓未？）仲儲緊，會繼續努力。」
另外，同場的前港姐冠軍翁嘉穗坦言是首次帶細仔來睇電影，笑言細仔怕醜不肯影相：「佢唔鍾意影相，連自己生日party都唔影，好有性格。」