女子組佔上風 Archie諗計追落後
身為聲夢五強學員的冼靖峰（Archie）與何晉樂（Rock），未正式出道就有機會在麥花臣開騷，2人大感難得，Archie預告會在騷上獻唱快歌，望為觀眾帶來驚喜。對於聲夢女學員較受歡迎及工作機會多，Archie稱並不羨慕：「我會諗點解有呢個差距，睇吓自己可以點改善，我會喺音樂上同身形上Keep好啲。」Rock就戥女子組開心，他會多拍片放上社交網讓更多人認識自己。
談到感情方面，Rock坦承有拍拖：「我好想低調，我係擔心對方有壓力。（驚被起底？）我行得正企得正，驚咩！」而Archie現時單身，鍾情智慧型女生，他坦言比賽後的確受到更多女同事歡迎：「會搵我簽名同影相，又多咗人搵我食飯。」不過他最近已辭去銀行工作，專心做全職歌手：「都大犧牲㗎！家人初時唔係好支持，佢哋擔心我3分鐘熱度，怕維持唔到生計，依家佢哋睇到我有幾大決心。（點維生？）我有積蓄，如果真係唔得，就幫人補習。」從事保險業的Rock雖未有辭工，但在時間上會分配更多在音樂上。