何廣沛生日 避談朱晨麗 朱智賢進擊：有我陪你！
何廣沛昨日生日於工作中度過，雖然未獲「正印」朱晨麗相伴，但有另一「朱朱」朱智賢陪住先，他笑言焗住要開心滿足！
藝人何廣沛、江嘉敏、朱智賢（朱朱）、陳曉華、郭子豪等昨日出席「《食腦喪B》喪．同你玩」活動谷劇，期間廣沛獲送上生日蛋糕。問他如何慶生？他說：「尋日拍劇濕身度過12點，今日有fans，當正係生日會o架喇！（私下點慶祝？）冇，仲開緊工。」問到緋聞女友朱晨麗可有約他？他即避談，身旁朱智賢即搶着說：「有我呢個朱朱陪住你先啦！」再問壽星仔夜晚可有另一朱朱相陪？他即笑說：「會同屋企人過，今日有呢個朱朱（朱智賢）陪已經好開心滿足，焗住要滿足啦！（咁朱晨麗有咩表示？）你要問佢喇！」
現場見到朱智賢手部及膝蓋受傷，她透露：「之前跑步突然kick親，成個趴喺地擦傷，其實明明行山難啲我都冇仆，反而跑步唔知點解仆得咁應。」她笑言當時馬路有很多車因紅綠燈停下：「我唔敢望佢哋，覺得好樣衰。」問到可會叫男友謝東閔幫手照顧？她說：「呢啲自己嚟啦！（男友可以幫你沖涼？）我右手仲郁得，可以洗頭。」
郭子豪擔心女友發展
同場的郭子豪對於有傳他不准女友鄧卓殷與黃庭鋒拍咀戲，故女友辭演新劇《雙生陌生人》，對此他拒回應，只說：「交番佢自己回應。（話係因為你？）我冇回應。（即係唔關你事？）冇回應。」他否認是醋男友，亦謂如果工作需要，會接受女友拍親熱戲，講到他被誤會阻礙女友發展？他說：「冇辦法，做好自己。」又承認擔心事件會影響女友事業。