「後生女」火速上位慢熱 呂靜文練大膽
現年20歲的「後生女」呂靜文（Bonnie）去年憑無綫節目《#後生仔傾吓偈》出道，短短一年已被睇中並參與多個節目，包括加入娛樂新聞台做主播訓練口才，並拍攝4部劇集《星空下的仁醫》、《青春不要臉》、《凶宅清潔師》及《痞子殿下》。
Bonnie不諱言為人慢熱，故拍綜藝節目較為蝕底：「依家努力改善緊，希望可以大膽啲，表達多啲自己。」而她接觸拍劇後就愛上：「覺得挑戰性好大，可以接觸好多未試過嘅嘢，感受唔同嘅人生。」又指在《星》劇飾演鍾嘉欣的年輕版，視對方為學習目標：「因為佢都係差唔多我呢個年紀入行，細細個睇佢啲電視劇已經好鍾意佢，好欣賞佢嘅態度，對自己好有要求，好有目標同散發住正能量。」