讚古天樂有心「護花」 姚焯菲：佢可能驚講錯嘢！
藝人姚焯菲（Chantel）日前與古天樂同場，對方受訪時拒談《聲夢》，事件昨日繼續發酵。Chantel回應時甚有大將之風，指對方只是為大家着想。
《聲夢傳奇》5位學員Chantel、Rock、詹天文、張弛豪及林智樂昨日在銅鑼灣出騷，吸引Fans逼爆3層商場，唱片公司高層何麗全親自監場，又以手機拍下演出及觀眾的反應。
事後Chantel與Rock齊齊受訪，談到古天樂拒回應有關《聲夢》問題，他們表示不介意，Chantel說：「佢咁做都係保護我哋，因為大家唔係接觸得好多，佢可能驚講錯嘢。（想合作？）想，但點都要做好眼前嘅演唱會先，其他嘢遲啲先算。」Rock則說：「古生係我哋嘅前輩，相信大家都好想同佢合作。（冇唔開心？）佢都冇講啲咩，觀點見仁見智，我覺得古生同我哋同台合照都好開心。（有傾偈？）咁多傳媒朋友圍住佢，點埋到身呀？」
演唱會加場
何麗全則宣布《聲夢演唱會》加場：「唔想啲學員孭飛債，8月12號加最後1場，總共4場，冇得再加喇！因為場地檔期問題。（演唱會之前為學員推出單曲？）炎明熹同張弛豪嘅新歌正在準備中，我哋仲安排咗姚焯菲、鍾柔美、詹天文及文凱婷演唱《多啦A夢》主題曲，以配合今年嘅兒歌金曲頒獎禮。」又坦言炎明熹較適合單飛發展。問每位學員是否獲公平對待，他說：「一定會，起碼每個學員都有自己單曲，以配合佢哋嚟緊拍嘅青春劇。（積極訓練佢哋嘅演技？ ）佢哋有啲已經上緊藝員訓練班。」