姜皓文守護愛妻至死不渝

現實做戲傻傻分不清

因拍攝期間正值疫情爆發，他為太太安全着想而忍痛「分居」數月，在外租住服務式住宅，沒料角色太過虐心，令他非常痛苦：「我覺得好似有病咁，好多時將戲中憶妻情緒帶返去當時嘅住所，但返到去又見唔到太太。有時太太嚟送飯，戴住口罩未望清楚個樣又走，想傾兩句都難，有時頂唔順會叫太太拎糖水嚟，要甜番吓！（太太開解你？）佢有叫我睇住，之前仲幫我約見心理醫生，演呢個劇角色，就更加好似自己有事咁，不過我未去見醫生。」

夫妻故事寫入劇本

黑仔與太太殷寧相愛相知22年，經歷幾許風雨，不過暴風雨過後總有放晴的一天，黑仔不諱言也有跟太太談及生死，惟觸及此話題，鐵漢亦不禁數度哽咽：「我成日同太太講，將來到咗某個年紀邊個會留低先？最後我話我留低，因為幸福係走咗嗰個，我喺度幫佢打點一切。冇諗過呢啲真係喺劇本度寫出嚟，牽動到我，希望都牽動到觀眾。」

性格火爆的他曾受情緒困擾，問有否擔心問題再出現？黑仔說：「都驚，有時屋企少少嘢就會好忟同唔鍾意，我都會叫自己冷靜先，太太仲話我再係咁就唔好做戲，成日淨係識放唔識收，佢講到咁，我梗係要聽晒佢話啦！」