創新金句向Leon挑機 張敬軒化身「夢幻May」：食完早餐都空肚！
張敬軒空降黎明演唱會舞台，他無懼在金句王「偶像」面前暢談「早餐論」大放笑彈，更笑言想改名做「阿May」，與偶像享受夢幻一夜。
有「新一代歌神」之稱的張敬軒前晚為黎明（Leon）演唱會擔任嘉賓，Leon有「唔可以空肚食早餐」的經典金句，軒仔則經常分享家中「遮遮」獨特廚藝而成為「早餐界KOL」。軒仔在騷上藉「早餐論」大放笑料，他對Leon說：「你就唔可以空肚食早餐，而我就食完早餐都空肚！所以我哋上次食飯嘅時候，我咪食好多，食咗兩份。」全場爆笑。
大讚偶像夠體貼
軒仔自認是Leon的忠粉，能夠站上黎明演唱會的舞台感覺很神奇，似足坐上時光機回到最開心快樂的時代，他表示入行時已聽到不少人讚黎明好好人，而他更親自印證，大讚Leon：「係遇過、相處過最體貼嘅前輩。」他又自爆：「我一直稱呼佢『黎生』，但佢叫我嗌佢Leon，我心諗：『一嗌Leon，就想叫自己做阿May！』今晚係好夢幻嘅一晚。」最後他揀選了黎明的經典歌《我的親愛》合唱，2人邊唱邊做出招牌「Sayonara o」動作，全場觀眾都high爆。