「佛系」應對換獎傳聞 炎明熹棄追名次 無懼入雪櫃

無綫歌唱選秀真人騷《聲夢傳奇》6強炎明熹（Gigi）、「國民初戀」姚焯菲（Chantel）及鍾柔美（Yumi）等，昨日偕其他參賽者出席商場活動，獲星夢高層何麗全及500名粉絲捧場，場面墟冚。參賽者輪流上台唱歌，之前聲帶出事的Gigi已差不多回復過往水準。

有指Gigi的親友在背後發功，向外宣稱她是自由身，借唱片公司招手為由逼無綫頒冠軍，Gigi表示不知情：「都冇必要問番屋企人。（擔心受牽連影響成績？）只要做好自己就得，目標只係想唱好歌。」她坦言心情未受影響，因為自己很容易忘記不快事，亦不擔心受傳聞影響奪冠，自言只想吸取經驗，不計較名次。問到可擔心此事會激嬲無綫，將她投閒置散？她表示：「順其自然，因為我都唔知，交畀個天同公司安排，我個人比較佛系。（放你入『雪櫃』都唔怕？）雪櫃幾涼爽，尤其是夏天，哈哈！」

Chantel興奮又緊張

至於Chantel獲型爆爸爸捧場，提到勁敵Gigi是非纏身，對她奪冠是否更有優勢？她直言：「唔覺，公司公平，唔會特別偏心。」在旁的Yumi亦表示：「順其自然，都係睇大家鍾唔鍾意啲表演。」決賽將至，Chantel坦言心情興奮，同時有少許緊張：「始終係最後一次喺《聲夢》舞台，好想有最精彩嘅表演。」Yumi則表示能走到這步已經很滿足。