熊黛林瞞住老公北上搏殺
名模熊黛林（Lynn）昨日出席在旺角舉行的醫學美容店開幕活動，穿上一襲Deep V白色貼身晚裝上陣，谷胸零肚腩，身材Fit爆！她透露早前在內地拍了2部電視劇和2部電影，日接夜開工，並於橫店和上海兩地走，雖然辛苦，但很開心。她曾短暫返港1個月，經常被2個囡囡問何時回家，令她不禁眼濕濕。
Lynn表示今次回港主要是陪囡囡開學返幼稚園，約2個月後又要走，今次更是瞞住老公：「佢未知，佢之前有詐型，上次已經叫唔好走咁耐，今次留2個月又走，佢會癲！」但她直言不想放棄拍戲：「好多人都話我依家搵番自己事業個人靚咗，有番自信。（老公會唔會鬧？）少少，但係叫我唔好太辛苦，驚我搞唔掂。我做嘢就唔記得食嘢，佢擔心我。」