羅孝勇閃得快 冇被何慈茵拆祠堂
歌手羅孝勇參與無綫J2奧運特備節目《明星運動會前哨戰：Fight盡》拳擊項目，早前與「腰帶拳后」何慈茵操練，腹部硬食多拳亦面不改容。他表示與女仔練拳會就住打：「同女仔對打一定輸，因為我唔會出手！（憐香惜玉？）可能我全屋女仔，女、老婆連狗仔都係女，慣咗！好似囡囡想買糖，我盡量唔心軟，但後尾都會買畀佢。」
唔忍心打兄弟
何慈茵則笑說：「會問定男對手有冇戴護陰，因為經常唔小心出咗腳，試過輕輕一掃個男人下體，佢即刻跪低，好痛苦。（掃過羅孝勇下體？）佢生得高大又身手靈活，唔係好掂到佢。」
羅孝勇為是次賽事操拳3星期，與大家成為好友，落場要「真打」感矛盾：「同謝東閔、吳業坤最Friend！大家巨聲幫，識咗11年，好彩磅數唔同，唔使同佢哋打。」他自爆操練時哮喘發作，加上幾年前撞車致脊椎骨折的舊患愈來愈痛，但他不想以此為藉口：「痛已經係陪住我嘅朋友。」而他創作的英文歌《Seeing Stars》成為節目插曲。
此外，昨日播映的第4集進入淘汰階段，羅孝勇剝衫過磅時身形最大隻，鄭俊弘與吳業坤則分別勁減18及13磅，鄭俊弘覺得對自己有所交代，太太何雁詩為他自豪又心痛。