美國流行天后Britney Spears上周就廢除父親監護權上庭作供，其後即偕男友Sam Asghari飛往夏威夷茂宜島（Maui）度假散心，引來大批狗仔隊連日追蹤及狂影。她前日終於頂唔順，在社交網爆粗指控被滋擾，又不滿身材遭抹黑！
Britney與男友抵達夏威夷後即被狗仔隊狂影，日前被拍得一頭亂髮、身穿火紅比堅尼，在酒店露台與男友曬太陽，2人大玩自拍之餘，男友更向傳媒展示一身結實肌肉，認真騎呢！而Britney則公開與男友做Gym的搞笑片段，看來心情不俗。
不過，前日她突然上載一條向狗仔隊及Fans「溫馨提示」的自製短片，片中打上：「可以同不可以做：如果你係狗仔隊、Fans或喺我空間嘅任何人……喺我短訊嘅時候唔好同我傾偈，咁樣好無禮……」至於她認為應該做的事，就是在「同志驕傲月」聽住她的名曲《Oops!……I Did It Again》起舞。
她又留言狂轟狗仔隊：「喺茂宜島都幾瘋狂……狗仔隊知道我喺邊，真係唔過癮！！！實在幾難周圍去，因為呢班傻瓜持續出現影我嘅相，但佢哋唔止影我相……佢哋扭曲我嘅身體並搞垮我嘅形象，令人好尷尬！！！我知道我身形並唔完美，但我絕對唔係佢哋描繪中咁嘅款，實在好無禮同刻薄！所以狗仔隊，X你同懇求你哋死X開！！！ 」
另一方面，Britney日前上載度假片，戴住沙灘帽躺在沙灘上，有Fans踢爆她去年亦曾上載類似片段，除了打扮及甫士相同外，連沙灘上的海草位置亦一模一樣，懷疑她Po舊片！