張秀文被朋友出賣

無綫真人競技綜藝Show《識貨》進入第二周比賽，上周表現亮眼的陳嘉佳（細細粒），繼續信心十足推銷瘦身曲奇，更拉好友張秀文落水：「港姐代表，我識你咁耐，平時你食一粒澱粉都怕肥，呢隻曲奇你唔使驚！佢用『陷人』（杏仁）粉整，啱晒你食。」令張秀文非常尷尬！何遠東亦有樣學樣，要張秀文幫忙派試食包之餘，又稱呼她做「阿姐」，嚇得她急忙澄清：「撞鬼你呀！喺Do姐面前嗌我阿姐！」問到遭兩人連環爆大鑊，對方有否請食飯賠罪？張秀文笑說：「佢哋爆完都唔覺得自己有問題，又點會請食飯？完全感受到咩叫朋友係要嚟出賣。」