懶理緋聞 男友投信任票 黃嘉雯保持狀態 苦學等上位
劇接劇的黃嘉雯不斷努力自我增值，先後跟4位老師學演戲，為上位做花旦作好準備。之前與陳家樂傳緋聞的她向來毫無隱瞞，故男友對她100分信任。
無綫積極栽培新血上位，前香港小姐冠軍黃嘉雯（Carmaney）繼拍攝劇集《把關者們》、《十月初五的月光》後，最近再接演新劇《廉政行動2022》，備受力捧。Carmaney一直好好裝備，不斷「學藝」增值，曾跟多位老師學演戲和唱歌，就連花藝、寵物美容、馬術也兼收並蓄。
她說：「暫時戲份唔係好重，最緊要學好基本功，其實選港姐前已經跟老師學戲，一共跟過4位老師上堂，嚟緊都會再去學戲，當然真實嘅拍攝經驗係上堂學唔到嘅。」
保持腦筋急轉彎
Carmaney如此勤力，問到是否為挑戰做花旦鋪路時，她說：「唔係話挑戰就挑戰，想做好自己先，我好鍾意發掘新興趣，大學畢業之後少咗學習機會，覺得個腦轉得慢咗，所以好鍾意不停學嘢，唔同嘅老師有唔同教法，希望藉住上堂保持敏銳觸覺。」
同男友無所不談
已有位感情要好的外籍男友，不過她早前卻跟陳家樂合作拍攝《把關者們》時傳出緋聞，Carmaney指男友對她絕對信任，沒半點懷疑，她說：「大家一齊咗幾年，因為平時乜都同佢講，發生過咩事、認識咗咩人，所以對我絕對信任。」