傳簽5年約 姚焯菲：學業行先！
《聲夢》參賽者姚焯菲（Chantel）、藝人袁偉豪、黎諾懿及黃智雯等，前晚亮相無綫節目《開心大綜藝》，14歲Chantel早前被傳已簽下5年約，她未有否認：「9月就升中四，會利用暑假追番學業進度，盡可能兩邊兼顧，但一定要揀，我會以學業行先。」至於父母管教嚴，她認為是關心的表現，亦否認「驚咗吳業坤」。
袁偉豪玩遊戲被逼供，談到「最唔想同邊個合作」，他爽快答：「黃智雯囉！同佢拍劇呢兩年冇乜嘢做，佢腳頭唔係幾好！」事後他指只屬玩笑，不過坦承近兩年的確少了工作：「我淨係拍過一個半個廣告。」又指減少外出，感激太太張寶兒留在身邊當「最佳聆聽者」。而黎諾懿對太太懷孕仍未正面回應：「適當時候會話畀大家聽，不過恭喜唔嫌多！（幾時先講得？）差唔多喇！依家諗緊用乜嘢嘅方法公布，知道大家都關心胎兒性別，我會一次過講。」又坦言今次無論生仔定女都決定「兩個夠晒數」。