可憐天下型爸心 譚俊彥飛車延續情懷 森美享受失戀快感

譚俊彥（Shaun）與森美一樣都是電單車狂熱分子，他指以前父親狄龍會載他遊車河，故很想延續這份父子情，奈何被父親潑冷水：「之前買番我第一架（類型）電單車，想同佢（爸爸）去遊車河，攞車嘅第一日佢都有坐嘅，但實在太熱，同埋兩個男人身體嘅接觸……之後佢就冇睬過我，哈哈！」不過Shaun會將這份親子情送給下一代：「我知道8歲可以坐電單車，到時就可以車個女去跳芭蕾舞。」

精心拍片考小一

提到一對仔女，Shaun很感恩他們乖巧好學，不過在香港這個環境，「求學不是求分數」只是妙想天開，他笑言：「出面競爭真係好大，淨係阿女入小一呢個過程就已經好漫長，為咗入讀心儀嘅學校，我哋打晒燈做晒功課同個女拍片。我喺TVB拍劇手掌爆咗縫針都冇請假，但囡囡學校面試就一定要請假。」

淡定如Shaun，去學校面試都變緊張爸爸，問他會否願意幫仔女追星？他笑言：「咁我唔會，好老土，因為以前我好喜歡Beyond，有次我爸爸見到阿Paul，就同佢講，我個仔好鍾意你，成日喺房彈你啲歌，我覺得好醜囉，呢啲我會由佢哋自己做。」

森美早前代15歲女兒梁曦童捧呂爵安演唱會場成熱話，他就話「瀨嘢」：「我睇緊演唱會時，阿女叫我睇WhatsApp，原來叫我唔好再講佢，雖然我畀佢話，但個心係暗甜，覺得激嬲佢，感覺好得意。」

原來他是追星常客，早在3年前已為囡囡撲演唱會飛，想父女一齊去睇：「點知阿女話只想同佢啲friend去睇，嗰次真係心痛，有失戀嘅感覺，自己個女唔只係爸爸嘅『前世情人』，更加係『世上最難溝嘅女』，不過我好享受，會繼續開心咁追佢。」

寵女寵到近乎「病態」，問可會買定樓送給仔女？他竟然say no：「我唔會留錢畀佢哋，同佢哋講咗我啲錢會裸捐，畀小朋友安穩生活就OK，過分安穩就唔work，佢哋讀完書一定要出嚟做嘢，可以唔使攞錢返屋企，但要搵錢養自己，等佢哋有上進心。（阿女咪冇樓做嫁妝？）搵個有樓嘅老公囉。」

畀300萬留住個仔

至於與現年18歲的囝囝梁曦樂則有另一套相處方法，每當父子意見分歧時會攤開來傾，如當年反對囝囝到英國讀書，強調不是學費問題：「阿仔喺香港都讀到鍾意嘅科目，我咪同佢講喺英國讀書要300萬，如果你留喺香港讀，立即畀300萬現金佢，我覺得家人相處比讀書重要，但佢話將來唔只賺到呢筆錢，咁就證明佢好想去，我咪畀佢去囉。」