健達人：黃建東保持「動」力 Gym後加操最見效
藝人黃建東參選香港先生出身，然而踏入中年，當年的6塊腹肌自動消失，體重更一度升至200磅！近年不時被稱為「肥東」的他多次表示要減磅卻「得個講字」，不過最近終於有動力，做運動加上控制飲食，暫時已減去超過20磅贅肉。重拾健康人生的阿東表示：「最主要係我接咗個纖體產品廣告，同埋明白再肥落去始終唔係辦法。依家我1星期做足6日帶氧運動，跑步、舉重、打拳同街頭健身樣樣都做，總之方便自己就得，同埋最好係Gym後喺跑步機跑足半粒鐘，效果更明顯！啱啱開始時跑15分鐘就想放棄，我同自己講『唔得，點解同當初選港男比較退步得咁快？』要不斷為自己打氣。」
阿東深信老生常談──運動要持之以恒，想辦法提高自己的「動」力：「啱啱開始時，我試過腸痛同頭暈，但絕對唔係放棄嘅藉口。我喺農曆新年後開始減肥，能夠持續管理好作息，兩個月左右就有咁嘅成績！」他透露飲食方面戒飯及戒甜，每日飲20杯水，加上疫情下「自煮」，平日多以洋葱、雞胸肉及雞下髀等作主要食材，「口痕」時會以健康果仁作零食，雙管齊下，自然更得心應手！