拍廣告着三角褲？許廷鏗開價幾千萬

自稱「異父異母低能巨孖寶」的歌手鄭欣宜及許廷鏗昨日現身服裝品牌旗艦店的開張活動，後者坦言入行12年，激罕於宣傳片中着短褲，處男展露小腿，更抵死笑說以前的性感底線是腳眼：「好耐冇見過自己個『菠蘿蓋』！以前覺得出席活動着長褲莊重啲咁，但原來夏天着短褲係爽啲！」笑問是否「錢作怪」，有酬勞先着？他說不關事，追問是否酬勞愈多就露得愈多？他搞笑稱如果要用錢衡量的話，若接到幾千萬廣告就可由長褲變成三角褲：「幾千萬唔着褲就太便宜啦！（咁貴先着？）三角褲真係好大……（大咩先？）好大嘅……心理包袱！」