趁未有劇開「抖暑」江欣燕孖何遠東「姊弟檔」搵真銀

江欣燕（欣欣）、何遠東（東東）及何廣沛昨日出席矯正座墊《Gravity聯乘千色Citistore初夏發佈會》，曾於劇集演姊弟的欣欣及東東，同聲指角色深入民心，故能夠拍住上搵真銀實屬高興，欣欣更表示近期經濟有好轉，寄望各行各業也逐漸蓬勃起來。

自言很久沒有出席公開活動的欣欣，坦言感覺如同很久沒有出街：「依家未有劇開，所以放吓假先，因為唔想36度出住汗開工，又要成日補妝，真係試過會暈，所以都係休息2個月先。（秋天復工？）到時再算。」同樣放假中的東東，透露近日參與帶貨比賽，但預計會輸，故一早抱住學習心態：「個比賽好刺激，小寶（陳嘉佳）實在太有成績，佢喺內地一晚做到幾百萬嘅貨。（有冇向佢取經？）有請食飯，一餐食我幾千蚊，騷錢都畀埋佢，但佢咁好成績我真係好佩服，平時以為帶貨着重介紹產品，但其實點運用鏡頭都好重要，所以我嚟緊希望多方面發展。」

何廣沛留鬚咀蔣家旻

何廣沛獲一班「沛粉」到場支持，他透露近1年多因疫情關係，與粉絲已很久沒有見面：「粉絲成日問幾時可以見，真係好感恩，平時冇咁珍惜，係要隔一隔先知道原來係咁難能可貴。」忙於拍攝劇集《雙生陌生人》的他，笑指因出席活動關係，變相集中拍攝同劇的馬德鐘戲份：「第2次同馬德鐘合作，成日都可以提前收工，因為大家做足晒工夫先開工，同埋所有對手都好好。（同蔣家旻有感情線，拍咗親熱戲未？）拍咗啲，佢係一位好好嘅師姐，同佢合作冇難度。（咩程度嘅咀戲？）擁吻囉！但呢套劇我要留鬚，唔知家旻感覺如何？我唔好意思問啦，咁尷尬。」談到即將舉行的無綫《明星運動會》，他表示與方紹聰、郭子豪等組隊參加400米接力賽，雖然尚未有時間練習，但滿有信心指眾人默契充足，預料勝出沒難度。