黃智賢「二同」保夫妻恩愛
藝人黃智賢在熱播劇《逆天奇案》飾演O記高級督察，與陳展鵬各自帶領組員查案。黃智賢大讚拍檔是好爸爸：「見佢碌電話睇童裝同裝修，嗰時我又搬屋，所以一齊睇裝修。」
愛情方面，他與畫家老婆Maggie相愛逾30年，出名是「愛妻號」的他分享維繫感情的秘訣，就是同步、同心：「經過好多磨合走到依家，條路2個咁樣行出嚟，就係同步；耐咗有默契，好多嘢唔使講出嚟都知對方想要咩，就係同心。」他坦言夫妻一定會吵架，但會停一停，聆聽老婆的想法：「只要大家有咁嘅心去夾，就可以排除萬難。」他又自爆不時送驚喜冧老婆：「佢好鍾意花，我會定期喺屋企換花，事前唔同佢講。我好在乎佢欣唔欣賞，哪怕係煮餐飯或插盆花，佢話鍾意我就好開心。二人世界就係我取悅你、你取悅我。」