與馬國明小別 婚期冇傾過 湯洛雯隨性：有可能唔結！

「靚湯」湯洛雯在劇中飾演女捕快「蘇柔」，今次是她打得最多的一套劇，難免受傷：「我拗過幾次柴，但因為我係慣性拗柴，所以屈一屈就彈番起身。」講到今次再與蕭正楠合作，她難忘2人輪流又孭又抱，笑言：「有場戲要孭住阿蕭，佢話自己辛苦過我，但我係孭住一舊重過我嘅嘢，仲要面不改容。」

笑蕭正楠體弱

之後她終於可以「報仇」：「佢有幕公主抱抱番我嘅，我仲唔報仇呀？食咗幾碗飯先拍呀，哈哈！我叫佢練定肌肉先，抱第一下佢都沉咗落去，我幾驚，已經捉緊佢條頸卸力，但唔知點解佢咁弱囉！」

去年6月拍此劇時正值靚湯與馬國明公開認愛，短短1年內已多次傳出婚訊，對此她無奈說：「明白大家關心，但我哋想做對自然嘅情侶，有時都驚大家聽到厭。」情侶間少不免講及結婚話題：「有普通情侶嘅共識，但冇exactly傾，因為真係未有咁嘅打算，所以8月結婚傳聞係冇可能。」

講到身邊不少好姊妹已結婚甚至生仔，她卻不會因此而心急：「每個人嘅路都唔同，最緊要適合、自己開心，覺得時間啱就做，我好隨性。（會唔會突然閃婚？）可能呀，但亦有可能唔結，我唔係好傳統嘅女仔，唔係一定要結婚。」她亦坦言父母沒有催婚：「佢哋唔傳統，冇特別一定要做公公婆婆。（可能男友心急啲想結婚生仔？）冇喎，佢好chill（隨意），比我更勝一籌，佢chill到連嘢都可以唔食，我chill就係食咩都得啫，但我要食嘢囉，哈哈。」

男友忙商演

至於仍在內地做商演的馬國明，未能返港宣傳將於本月14日起播出的《寶寶大過天》，他說：「依家喺橫店，月頭同尾都有活動要喺呢度出席，上嚟之前都唔知套劇出，所以之後可能喺社交網出力宣傳吓啦！」而靚湯之前在活動中盡女友本分，幫男友宣傳新劇。