克勤追問買豪宅 老婆鬧多事

譚詠麟（阿倫）、李克勤、李佳芯（Ali）與陳展鵬等，前晚到電視城出席無綫慈善節目《萬眾同心公益金》，首任慈善騷司儀的港姐亞軍陳楨怡，以爆乳造型揮低同場女星。

「睇新聞先知」

手持拐杖現身的克勤，透露繼日前踢波傷膝後，近日腰部舊患亦復發。談到太太盧淑儀近日以首置身份，豪擲逾2,500萬元買黃竹坑豪宅，他笑言：「我幾乎係睇新聞先知，佢趁我教緊人唱歌、唔係好覺嘅時候略略提過，直到我睇到報道，我問佢，佢就話我『多事、識乜』。（太太用私己錢買？）唔知，我都一頭霧水！（自住定投資都唔知？）等我返去問吓佢先。」對於《聲夢傳奇》一班導師近日被轟胡亂淘汰學員，身為主理人的他理解導師們的困難，坦言手掌手背都是肉，當日決定不做評判有先見之明，毋須參與淘汰環節。

譚詠麟、曾志偉	陳楨怡低胸上陣，搶盡風頭。	李佳芯否認被富商力追。

志偉流TVB膿

已2年沒現身電視城的阿倫激讚《聲夢》參賽者炎明熹，指對方年紀輕又乖巧。對於網民指他「點燈」的藝人如接「死亡之吻」，他笑言：「傻啦，克勤唔作準，佢係大器晚成，陳奕迅同鄧紫棋喺內地未紅嘅時候我已經講，話係有實力，事實勝於雄辯，時間證明一切。」問到之後會否多點現身無綫，撐高層老友曾志偉？他笑言：「佢依家係『TVB八公』，每事問，為個台付出好大，克勤流住TVB嘅血，志偉就流住TVB嘅膿，有漿添！」

至於Ali否認被富商力追，指對方是她的生意夥伴，但從未到訪其豪宅：「佢唔係報道講到咁浪漫，佢公司有部雪機，開過一次畀我睇，我仲冇化妝自拍咗張相添，冇諗過咁就被人誤會。」