30億豪宅布滿天眼 旨呈匿百呎房仔瞓梳化

樂隊享樂團主音兼美容集團CEO鄺旨呈,家住赤柱市值近30億的豪宅,大宅自設「私人會所」,有大泳池、日式風呂及健身室等完善配套,但家裏僅100多呎的娛樂室才是他的小天地!今年是樂隊出道10年,去年旨呈發力參加《全民造星III》,之後陸續參與多個ViuTV節目,當中最激是在《ERROR自肥企画》親手為保錡脫陰毛,引起網民熱議,其富貴背景亦隨即翻Hit!

自嘲只係管家

生於單親家庭的他一直獨居,至10多歲才遷入豪宅與生母及繼父同住,近年媽咪帶同兩個妹妹隨繼父移民新加坡,留下他與兩頭迷你牧羊犬看守大宅。他指媽咪崇尚生活主義,2002年購入此幢4層高的逾萬呎豪宅,屋內裝修華麗,玄關位有兩張高背椅、雲石地板、水晶窗簾等,更有兩個日式風呂,但自媽咪移民後已荒廢。

他坦言全屋配套都冇享用過:「我一返屋企就入廚房搵嘢食,喺花園跳繩,之後返入我個娛樂室。我嘅作用係Housekeeper(管家),可能啲人覺得『你就好啦!咁大間屋!』,但你諗吓,全屋裝咗40幾部閉路電視,全日直播,做咩都無所遁形,所以我好少招呼朋友嚟。」他最終拆走娛樂室的閉路電視,總算擁有專屬的私人空間。娛樂室由他出主意設計,牆紙以綠色森林為主題,二手梳化只須4,000元,平日他在此作歌,累了便索性睡在梳化上。

旨呈父親家族都是頂級大廚,大伯曾為英女王下廚,自小耳濡目染,他對煮食亦甚有心得,故早前參加飲食節目《踢館》,但最激都是為保錡脫毛!他說:「一路以來,啲人話我浮浮沉沉冇紅過,自從參加《造星》之後,畀人睇到我好認真,會落手落腳做,唔係富二代只係揮霍!」他正構思明年舉行享樂團與《造星》Team A合作的音樂會。