衛蘭為籌款自薦做空中飛人
歌手衛蘭、Gin Lee（李幸倪）、泳兒、Kerryta及Mike昨日為慈善籌款騷綵排，衛蘭受訪時透露會跟《聲夢傳奇》「奶爸」李克勤、導師團隊Gin Lee及AGA合唱，又笑說若有時間準備的話，不介意吊威吔做空中飛人。
講到《聲夢》播出後網民對隊員有正負不同聲音，她坦言實有負評，會從中勉勵他們向前看，續自爆亦有被網民「開波」：「喺我社交平台鬧我Foul咗學員，但其實佢哋唔知背後有好多原因。」Gin Lee表示同樣受到「攻擊」，直言睇到負評有少少唔開心：「免不了！不過好快收拾心情，要做個榜樣畀學員睇點處理，正面啲睇，係觀眾睇得好投入。」提到她於節目中真情流露頻頻眼濕濕，她笑說比賽過程中感覺似訓練做家長，猶如做人阿媽湊仔：「除咗教唱歌，仲要同佢哋做心理輔導，但我係幾鍾意分享。」