被罵搖滾叛徒 SM：做音樂真係要錢！
樂隊Supper Moment（SM）為紀念入行15周年，宣布6月26及27日假九展Star Hall舉行《Supper Moment一直相信演唱會》，內部認購火速爆滿，而門票於後日公開發售，今次不揀紅館開騷，他們坦言因疫情影響，當初不敢亂入紙申請場地，15年前首個大型演唱會就在九展起步，所以作為紀念，選擇九展。
SM近年遭網民欺凌，指摘他們為賺錢成搖滾叛徒，嘲他們只識搵人仔，他們對攻擊默不作聲，又被指是害怕、潛水，4子最難容忍是已離世的經理人Gary都畀人鬧：「我哋好對唔住Gary。」他們決定拍片清楚地一次過交代，承認遭欺凌好嬲：「一直希望用時間去證明一切，我哋好蠢，唔識玩社交媒體來經營『形象』，只識得玩音樂。」對於被批評歌曲不貼社會議題，他們說：「如果啲嘢唔啱大家議題、口味，音樂都係冇罪(o架)，我都有自由做自己想做嘅音樂(o架)，樂隊有商業價值，又會標籤佢哋係搖滾叛徒，做音樂真係要錢，呢兩年我哋體會到玩音樂呢條路唔易行。」