張曦雯搬男友「擋箭」陳家樂呷醋

張曦雯（Kelly）昨日偕陳家樂出席活動，穿上高衩Tube Dress上陣，大晒健康性感！問她可知無綫重新剪輯她於節目《3日2夜》的片段，並放上網上平台「女神Channel」播出？她說：「唔清楚，我冇睇過。」

講到有網民質疑片段封面與ViuTV節目《ERROR自肥企画》相似，令她慘成箭靶之餘，片段更即被下架，Kelly揚言沒看過負評，不明所以：「啲片拍完幾時再用，我哋都唔知，交畀公司處理。（覺得封面相似？）有個句子係Imitation is the something flattery（某程度參考都係欣賞嘅一種），可能公司覺得佢哋做得好，想Copy吓！」然後醒目地用男友轉移視線：「不如講吓我男朋友吖！」豈料在旁的家樂「呷醋」大呻：「公開咗，你哋（記者）就唔逼婚嘅！原來係咁！」惟記者着他公開戀情時，他卻「笠水」封口。

重提被指與女友連詩雅（Shiga）冷戰一事，家樂說：「唔回應喇，太無聊！」再追問為何沒有恭喜女友憑微電影得獎？「520」示愛日冇行動？他即求饒：「我唔知點回答呀！太無聊喇真係！太多虛構嘅事就無謂答。」問是否已私下慶祝，家樂即搞笑地向Kelly求助，再笑說：「唔回應，哈哈！（Shiga返港後有冇見面？）唔話你聽，希望低調啲。（一直唔講嘅話，會唔會就分手？）哎呀！咩都唔想講呀！總之穩定啦！」

大方恭喜舊愛生B

另外，問他是否知道前度余香凝剛「卸貨」，他指朋友提過，並大方送祝福：「恭喜佢，希望佢開心。（傳短訊畀佢祝福？）未，因為我喺嚟緊嘅途中聽到呢件事，同埋我諗都係唔好打擾佢，大家有各自生活。」