愛犬病逝 高鈞賢製水晶悼念
近年多在內地工作的藝人高鈞賢（Matthew），早前北上拍攝劇集《黑金風暴》，並留在當地接Job搵真銀。日前，陪伴10多年的愛犬Mon Mon因病離世，他趕不及返港送別，遺憾之餘亦感心痛，家人為Mon Mon舉行喪禮並進行火化。
Matthew受訪時說：「Mon Mon都14歲半，之前肚屙得好緊要，醫生話佢年紀太大，跟住就走咗。不過佢由細到大都好幸福，好多時都有家人陪住，就算我唔喺香港，屋企人都好錫佢，所以我相信佢好幸福咁去咗天堂。」他之前決定簽邵氏，亦是希望多點時間陪牠，Matthew打算將Mon Mon的骨灰製成水晶，以後都可陪伴身旁。