薛家燕睇中「鮮肉」冧爆回春
薛家燕首個乖孫雖然仍未出世，但腳頭好，帶挈嫲嫲做廣告主角，而負責執導的家燕兒子Jackson明益媽咪，安排她與6呎嫩男合作，她笑說：「嗰位型男叫Daniel，識做戲又表情多，睇番Play back發覺我哋幾襯，我直情成個青春晒！」
問到與Daniel可有肌膚之親？她笑說︰「眼神好多接觸，手仔就應該冇掂到。」但暗示因疫情關係與圈外男友天各一方：「真正拖手仔呢排就冇喇，惟有靠手機同電腦傾偈，希望可以快啲拖到手仔啦！」她直言母子檔合作特別開心，但「投訴」Jackson要求高：「佢嫌我飲果汁飲得唔靚，話要做啲誘人動作！」又笑言狂灌3支果汁，結果頻頻去廁所！