胡鴻鈞「傳染」悲情 陳嘉慧喊到痹
向來理智的胡鴻鈞近期經常拍喊戲，昨日拍攝一場情感戲時觸動拍檔陳嘉慧，二人齊齊眼紅紅、索晒鼻！陳嘉慧透露日前拍攝一場喊戲時全程崩潰，更喊到全身麻痹。
藝人胡鴻鈞（Hubert）、陳嘉慧及羅蘭，昨日在西環拍攝劇集《愛上我的衰神》。劇情講述飾演Hubert嫲嫲的羅蘭離世，他執房時睹物思人，傷心落淚，陳嘉慧看到眼濕濕。Hubert受訪時坦言現實中向來理智，不是大情大性、情緒容易波動的人，但上套劇《十月初五的月光》及今次都有不少喊戲，是情感大爆發。
提到緋聞女友蔡思貝在節目《好聲好戲》配音爆喊，他表示有睇節目，大讚所有參賽者都表現得很好。對於思貝的聲線似足郭藹明，他笑說：「你問佢啦！做乜問我啫？（佢把聲你最清楚嘛！）咁佢真係好用心去捉摸嘅！（你敢唔敢挑戰？）我自問唔係個配音叻嘅人，都係唱歌同做戲得喇！」
Cut機閂唔到「水喉」
Hubert見到羅蘭時相當有禮，即叫「嫲嫲」，羅蘭亦親切問候：「點呀？夠唔夠瞓呀？」2人十足真嫲孫。至於首次與羅蘭合作的陳嘉慧，指前輩雖然已87歲，但日前拍攝鬧Hubert的戲份時，「戲」場及「氣」場都相當有勁，她亦有主動求教。她又透露大前日拍了一場激動喊戲，是她投入角色最深的一次：「真係喊到崩潰，自己太投入，喊完感覺到全身麻痹同冇力，導演Cut咗機我都停唔到。（感覺點樣？）好好玩，感覺好好。」