Jace見真身即彈鐘
環球「寵兒」陳凱詠（Jace）被喻為「貼地歌手」，多首熱爆歌均取材自生活細節，新歌《虛擬人與我》唱出與虛擬伴侶的相處，她自爆有網聊經驗，大學時期曾與隔籬學校的男生網聊，但她強調不是以識男友為目標而展開「激情」對話，純粹當識朋友，發現結果不似預期，即刻「彈鐘」：「傾完約出嚟，見到真人發覺完全唔好傾，原來個反差可以咁大，唔會乜都夠膽傾，又冇節奏、語調之分。（有下文？）冇呀！」
自認慢熱難「閃婚」
雖然有朋友成功透過玩交友App開花結果，但她堅決拒玩，深怕一不小心將私事全盤托出：「玩交友App花好多時間、心血，我又比較怕打字，無謂浪費人哋時間，加上我好容易講晒自己內心嘅嘢。」自認傳統的她笑謂現階段不是特別渴求拍拖，反而直接跳Step期盼遇見老公：「我係老土嘅，拍拖無謂拍散，不如搵個可以組織家庭。（閃婚？）我個人好難落決定，好保護自己，識一個人要慢慢觀察、再敞開心扉，以我性格未必閃到。」
Jace期待有日建立家庭皆因想生兒育女，以前曾幻想24歲結婚，翌年生小朋友，但人愈大愈覺得急不來，目前她將重心放在事業上，但笑言將來若有了小朋友，相信自己是嚴母：「一定要小朋友好有禮貌，冇禮貌會罰，但我唔會畀佢哋好大壓力，因為細個嘅時候爸爸、媽媽冇逼我去做啲咩，係個好快樂嘅成長環境，我會參考番呢個方法。」